அசத்தும் மே.இ. தீவுகள் அணியின் பந்துவீச்சாளர்கள்: 2-ம் நாள் உணவு இடைவேளையின்போது இங்கிலாந்து 106/5

20 views
1 min read
gabriel1

 

மேற்கிந்தியத் தீவுகள் அணிக்கு எதிரான முதல் டெஸ்டில் இங்கிலாந்து அணி 5 விக்கெட் இழப்புக்கு 106 ரன்கள் எடுத்து தடுமாறி வருகிறது.

செளதாம்ப்டனில் இரு அணிகளுக்கு இடையிலான முதல் டெஸ்ட் நேற்று தொடங்கியது. மூன்று ஆட்டங்கள் கொண்ட டெஸ்ட் தொடர் ஜூலை 28 அன்று முடிவடைகிறது. கரோனா அச்சுறுத்தல் காரணமாக மூன்று டெஸ்டுகளும் காலி மைதானத்தில் நடைபெறும் என இங்கிலாந்து கிரிக்கெட் வாரியம் அறிவித்துள்ளது. கரோனா அச்சுறுத்தலால் பல்வேறு கிரிக்கெட் தொடர்களும் போட்டிகளும் ஒத்திவைக்கப்பட்டுள்ள நிலையில் 116 நாள்களுக்குப் பிறகு சர்வதேச கிரிக்கெட் ஆட்டத்தைக் காணும் வாய்ப்பு ரசிகர்களுக்குக் கிடைத்துள்ளது.

இங்கிலாந்து கேப்டன் ஜோ ரூட்டின் மனைவி கேரி-க்கு 2-வது குழந்தை பிறந்துள்ளது. இதனால் முதல் டெஸ்டிலிருந்து ஜோ ரூட் விலகியுள்ளார். இங்கிலாந்து அணியின் கேப்டனாக ஆல்ரவுண்டர் ஸ்டோக்ஸ் நியமிக்கப்பட்டுள்ளார். ஜாஸ் பட்லர் துணை கேப்டனாகச் செயல்படுகிறார். 

மழை காரணமாக முதல் டெஸ்டின் முதல் நாளன்று 17.4 ஓவர்கள் மட்டுமே வீசப்பட்டன. டாஸ் வென்று பேட்டிங் தேர்வு செய்த இங்கிலாந்து அணி, 1 விக்கெட் இழப்புக்கு 35 ரன்கள் எடுத்தது. சிப்லே ரன் எதுவும் எடுக்காமல் கேப்ரியல் பந்துவீச்சில் போல்ட் ஆனார். பர்ன்ஸ் 20, டென்லி 14 ரன்களுடன் களத்தில் உள்ளார்கள்.

இன்றைய நாளின் முதல் பகுதியில் மே.இ. தீவுகள் அணியின் பந்துவீச்சாளர்கள் சிறப்பாகப் பந்துவீசினார்கள். ஜோ டென்லி 18 ரன்களில் கேப்ரியல் பந்துவீச்சில் போல்ட் ஆனார். தனது அடுத்த ஓவரில் பர்ன்ஸை 30 ரன்களில் வீழ்த்தினார் கேப்ரியல். கிராவ்லி 10 ரன்களில் ஹோல்டர் பந்துவீச்சில் ஆட்டமிழந்தார். 2 பவுண்டரிகள் அடித்த போப், ஹோல்டர் பந்துவீச்சில் வீழ்ந்தார்.

இதனால் 2-ம் நாளின் உணவு இடைவேளையின்போது இங்கிலாந்து அணி 5 விக்கெட் இழப்புக்கு 106 ரன்கள் எடுத்து தடுமாறி வருகிறது. ஸ்டோக்ஸ் 21, பட்லர் 9 ரன்களுடன் களத்தில் உள்ளார்கள். கேப்ரியல் 3, ஹோல்டர் 2 விக்கெட்டுகளை எடுத்துள்ளார்கள்.

TAGS
England v West Indies

Leave a Reply