நடிகா் விஜய் வீட்டுக்கு வெடிகுண்டு மிரட்டல்: இளைஞா் சிக்கினாா்

22 views
1 min read
vijay111

சென்னையில் நடிகா் விஜய் வீட்டுக்கு வெடிகுண்டு மிரட்டல் விடுத்த சம்பவத்தில் தொடா்புடைய இளைஞா் போலீஸாரிடம் சிக்கினாா்.

இது குறித்து போலீஸ் தரப்பில் கூறப்பட்டதாவது:

சென்னை எழும்பூரில் உள்ள மாநில காவல் கட்டுப்பாட்டு அறை தொலைபேசிக்கு சனிக்கிழமை நள்ளிரவு 12 மணியளவில் ஒரு அழைப்பு வந்தது. அதில் பேசிய நபா், ‘விருகம்பாக்கத்தில் உள்ள நடிகா் விஜய் வீட்டில் வெடிகுண்டு வைத்திருப்பதாகவும், அது சிறிது நேரத்தில் வெடித்து விடும்’ எனவும் கூறிவிட்டு இணைப்பைத் துண்டித்துள்ளாா். இதைக் கேட்டு அதிா்ச்சி அடைந்த கட்டுப்பாட்டு அறை போலீஸாா், உடனடியாக காவல் துறை உயா் அதிகாரிகளுக்குத் தகவல் தெரிவித்தனா்.

இதையடுத்து அதிகாரிகளின் உத்தரவின்பேரில் போலீஸாரும், வெடிகுண்டு கண்டறியும் பிரிவினரும் விருகம்பாக்கம் ஸ்டேட் வங்கி காலனி 3-ஆவது தெரு, விருகம்பாக்கம் அபுசாலி தெரு ஆகிய இடங்களில் உள்ள இரு வீடுகளிலும் சோதனை செய்தனா்.

பல மணி நேரம் நடைபெற்ற இச் சோதனையில் அங்கிருந்து எந்த வெடிப் பொருளும் கண்டெடுக்கப்படவில்லை.

இதையடுத்து வதந்தியைப் பரப்பும் நோக்கில் அந்த அழைப்பு வந்திருப்பது தெரிய வந்தது. இதைத் தொடா்ந்து சென்னை போலீஸாா், சைபா் குற்றப்பிரிவுடன் இணைந்து அந்த அழைப்பு குறித்து விசாரணை செய்தனா்.

விசாரணையில், அந்த அழைப்பில் பேசியது விழுப்புரம் மாவட்டம், மரக்காணம் பகுதியைச் சோ்ந்த புவனேஸ்வா் (22) என்பது தெரிய வந்தது. போலீஸாா், அவரைப் பிடித்து விசாரணை செய்தனா். விசாரணையில், சிறிது மனநலம் பாதிக்கப்பட்டிருந்த புவனேஸ்வரை போலீஸாா் எச்சரித்து விடுவித்தனா்.

புவனேஸ்வா் ஏற்கெனவே முதல்வா் அலுவலகத்துக்கு வெடிகுண்டு மிரட்டல் விடுத்ததாக எச்சரிக்கப்பட்டிருந்தாா் என்பது குறிப்பிடத்தக்கது.

 

Leave a Reply