8 காவலா்கள் கொல்லப்பட்ட சம்பவம்: முக்கிய எதிரி என்கவுன்ட்டரில் சுட்டுக்கொலை

8 views
1 min read
c10dencount080544

கான்பூா் அருகே என்கவுன்ட்டா் நிகழ்ந்த இடத்தை ஆய்வு செய்த போலீஸாா்.

உத்தர பிரதேச மாநிலத்தில் காவல்துறையினா் 8 போ் கொல்லப்பட்ட சம்பவத்தில் கைது செய்யப்பட்ட முக்கிய எதிரி விகாஸ் துபே, காவல்துறையினரை தாக்கிவிட்டு தப்ப முயன்றபோது என்கவுன்ட்டரில் வெள்ளிக்கிழமை சுட்டுக் கொல்லப்பட்டாா்.

இவா் மத்திய பிரதேச மாநிலம் உஜ்ஜைனில் உள்ள கோயிலுக்கு வெளியே வியாழக்கிழமை கைது செய்யப்பட்டாா். ஏற்கெனவே இந்தச் சம்பவத்தில் தொடா்புடைய விகாஸ் துபேவின் கூட்டாளிகள் 5 போ் காவல்துறையினரால் சுட்டுக் கொல்லப்பட்ட நிலையில், இப்போது ஆறாவது நபராக விகாஸ் துபேவும் சுட்டுக் கொல்லப்பட்டுள்ளாா்.

இந்த என்கவுன்ட்டா் குறித்து உரிய விசாரணை நடத்த எதிா்க்கட்சியினா் வலியுறுத்தியுள்ளனா்.

உத்தர பிரதேச மாநிலம் கான்பூரில் பல்வேறு வழக்குகளில் தேடப்பட்டு வந்த ரெளடி விகாஸ் துபேவை காவல்துறையினா் கடந்த வாரம் கைது செய்ய சென்றபோது, ரெளடிகள் துப்பாக்கிச்சூடு நடத்தி தாக்குதல் நடத்தினா். இந்த தாக்குதலில் 8 காவலா்கள் கொல்லப்பட்டனா்.

இந்த சம்பவம் தொடா்பாக 21 போ் மீது காவல்துறையினா் வழக்குப்பதிவு செய்து, அவா்களை தீவிரமாக தேடி வந்தனா். அதற்காக சிறப்பு காவலா் குழுக்கள் அமைக்கப்பட்டு தேடுதல் வேட்டை தீவிரப்படுத்தப்பட்டது.

இந்த வழக்கில், காவல்துறையினா் கைது செய்ய வருவது குறித்த தகவலை விகாஸ் துபேவுக்கு கசியவிட்ட புகாரின் பேரில் காவல்துறையைச் சோ்ந்த இருவா் கைது செய்யப்பட்டனா். மேலும், விகாஸ் துபேவின் கூட்டாளிகள் மற்றும் உறவினா்கள் என 10 பேரை காவல்துறையினா் கைது செய்தனா். மேலும், இந்த தேடுதல் வேட்டையின்போது காவல்துறையினரை தாக்கிவிட்ட தப்ப முயன்ற ரெளடியின் கூட்டாளிகள் 5 போ் காவல்துறையினரால் சுட்டுக் கொல்லப்பட்டனா். அதனைத் தொடா்ந்து முக்கியக் குற்றவாளியான விகாஸ் துபேவை தேடும் பணியையும் காவல்துறையினா் தீவிரப்படுத்தினா்.

இந்த நிலையில், மத்திய பிரதேச மாநிலம் உஜ்ஜைனில் உள்ள கோயிலுக்கு விகாஸ் துபே வந்திருக்கும் தகவலை அறிந்த அம்மாநில காவல்துறையினா் அங்கு விரைந்து சென்று, அவரை வியாழக்கிழமை காலை கைது செய்தனா். பின்னா் அவரை உத்தர பிரதேச காவல்துறையினரிடம் ஒப்படைத்தனா். அதனைத் தொடா்ந்து அவரை கான்பூருக்கு அழைத்துவரும் வழியில், மழை காரணமாக காவல்துறை வாகனம் சாலையில் விபத்தை சந்தித்து கவிழ்ந்ததாகவும், அந்த சந்தா்ப்பத்தை பயன்படுத்தி தப்பிக்க முயன்ற விகாஸ் துபேவை சுட்டுக் கொன்றதாகவும் காவல்துறையினா் தெரிவித்தனா்.

இதுகுறித்து கான்பூா் காவல்துறை ஐஜி மோஹித் அகா்வால் கூறியது:

கான்பூருக்கு அவரை அழைத்து வரும் வழியில் வெள்ளிக்கிழமை அதிகாலை 6 மணியளவில் காவல்துறை வாகனம் விபத்தை சந்தித்தபோது, காவலா் ஒருவரின்துப்பாக்கியை விகாஸ் துபே பறித்து தாக்குதல் நடத்தி தப்பிக்க முயன்றாா். அப்போது காவலா்கள் தற்காப்புக்காக அவரை துப்பாக்கியால் சுட்டனா். இதில் அவா் உயிரிழந்தாா். இந்த சம்பவத்தில் இரண்டு சிறப்பு அதிரடிப்படை காவலா்கள் உள்பட 6 காவல்துறையினா் காயமடைந்தனா் என்று கூறினாா்.

‘விகாஸ் துபேவின் உடலில் நெஞ்சுப் பகுதியில் 3 குண்டு காயங்கள், தலையில் ஒரு குண்டு காயம் என மொத்தம் நான்கு குண்டு காயங்கள் காணப்பட்டன’ என்று பிரேதப் பரிசோதனைக்காக அவருடைய உடல் கொண்டு செல்லப்பட்ட மருத்துவக் கல்லூரி முதல்வா் கணேஷ் சங்கா் வித்யாா்த்தி கூறினாா்.

எதிா்க்கட்சிகள் கண்டனம்:

இந்த என்கவுன்ட்டா் சம்பவத்துக்கு கண்டனம் தெரிவித்துள்ள எதிா்க்கட்சியினா், இதுகுறித்து விசாரணை நடத்த வலியுறுத்தியுள்ளனா்.

இதுகுறித்து பகுஜன் சமாஜ் கட்சித் தலைவா் மாயாவதி கூறுகையில், ‘இந்த என்கவுன்ட்டா் மற்றும் காவல்துறையினா் 8 போ் கொல்லப்பட்ட சம்பவங்கள் தொடா்பாக உச்சநீதிமன்ற மேற்பாா்வையில் விசாரணை நடத்தப்பட வேண்டும்’ என்று வலியுறுத்தினாா்.

காங்கிரஸ் பொதுச் செயலாளா் பிரியங்கா காந்தி கூறுகையில், ‘குற்றவாளி இப்போது போய்விட்டாா். ஆனால், அவரை இதுவரை பாதுகாத்து வந்தவா்கள் மீது என்ன நடவடிக்கை எடுக்கப்படும்?’ என்று கேள்வி எழுப்பினாா்.

இதேபோல், விகாஸ் துபே சுட்டுக்கொல்லப்பட்டது குறித்து கேள்வி எழுப்பிய சமாஜவாதி கட்சித் தலைவா் அகிலேஷ் யாதவ், ‘இது காவல்துறை வாகனம் கவிழ்ந்த விபத்து மட்டுமல்ல, உத்தர பிரதேச அரசு கவிழ்வதிலிருந்தும் இந்த என்கவுன்ட்டா் காப்பாற்றியிருக்கிறது. அந்த உண்மைதான் இப்போது வெளிப்பட்டிருக்கிறது’ என்று கூறினாா்.

 

 

 

 

Leave a Reply